Пансионат облыстық көпбейінді аурухананың перинаталдық орталығы базасында жүзеге асырылады.
Жобаның мақсаты – жүкті әйелдердің денсаулығын сақтау және перинаталдық көрсеткіштерді жақсарту. Пансионатта тәуекелі жоғары жүкті әйелдерді облыстың шалғай ауылдарынан ертерек ауруханаға жатқызу үшін 10 төсек орын қарастырылған. Қажеттілікке қарай бұл орын саны 20-ға дейін көбейтілуі мүмкін.
Болашақ аналар босанғанға дейін бұл жерде медициналық қызметкерлердің тұрақты бақылауында тегін болады. Акушер мамандар жүкті әйелдер мен ұрықтың жағдайын тәулік бойы қадағалап отырады. Босану белгілері пайда болған жағдайда немесе қандай да бір шағымдар анықталғанда, дәрігерлер шұғыл медициналық көмек көрсетеді.
Жобаның негізгі мақсаты – жүкті әйелдерге білікті медициналық көмектің қолжетімділігін қамтамасыз ету, мүмкін болатын асқынуларды ерте анықтап, дұрыс әрі дер кезінде емдеу тактикасын белгілеу. Мұндай тәсіл перинаталдық нәтижелерді жақсартып, күрделі жағдайлардың алдын алуға мүмкіндік береді.
«Дені сау ана» пансионаты – Ақмола облысында ана мен бала денсаулығын қорғаудың қауіпсіз, тиімді және пациентке бағдарланған жүйесін құру жолындағы маңызды қадам болмақ.