Қазақстан Республикасының Ұлттық ғылым академиясының академигі, ҚР Мемлекеттік сыйлығының лауреаты, «Еңбек Ері» атағының иегері, «Ұлттық нейрохирургия орталығы» АҚ Басқарма төрағасы, еліміздің бас нейрохирургі Серік Ақшұлақов, Қазақстанның еңбек сіңірген қайраткері, Халықаралық гепатолог-хирургтер қауымдастығының мүшесі Серік Тоқпанов, клиникалық және іргелі медицина академиясының академигі, «Астана» медицина университетінің онкология кафедрасының меңгерушісі Абай Мәкешев, жоғары санатты хирург, Сызғанов атындағы хирургия ұлттық орталығы бөлімінің меңгерушісі Мақсат Досханов ақмолалық әріптестеріне көп жылдық тәжірибесін жеке көрсетті. Өңір басшысы барлық мамандарды өзі шақырғанын және мұндай іс-шаралардың аймақ үшін маңызы зор екенін атап өтті. Ақмола облыстық көпсалалы ауруханасының бас дәрігері Нұрлан Жаров облыс басшылығына ауқымды семинар ұйымдастырғаны үшін алғысын білдірді.

– Бүгін өңірімізде маңызды оқиға өтіп жатыр, бұл біздің жергілікті мамандар үшін үлкен мотивация және баға жетпес білім. Өйткені тәжірибе алмасу – жас дәрігерлер үшін өте қажет. Астана қаласынан келген әріптестермен көптеген өзекті аймақтық мәселелер талқыланды, тәжірибемен қатар абдоминалды хирургияның өзекті мәселелері бойынша ғылыми конференция өткізу жоспарлануда. Конференция аудандық дәрігерлер тарапынан үлкен қызығушылық тудыруда, себебі ауылдық денсаулық сақтау саласында шешуді қажет ететін көптеген мәселелер бар. Аурухананың материалдық-техникалық базасы қанағаттанарлық, мемлекет көмегімен жаңартылып отырады. Жақында ғана жоғары технологиялы және күрделі операцияларға арналған ангиографиялық жабдық енгізіліп, біздің ауруханада сәтті қолданылып келеді. Бұл семинар біз үшін өте маңызды, мен әріптестерім оның нәтижесінде өз кәсіби деңгейін көтеретініне сенімдімін, – деді Нұрлан Жаров.